“No pone COHO (ántes CHE) un banda, pasó no tin un mihó alternativa”(1). Esaki mi a bisa na un foro di PNP un aña pasá.
Partidonan den Fòrti ku a kampañá pa reachasá COHO pasombra e ta rekolonisashon, pa despues presentá ‘Plan B’ ku a baha fo’i mesa ku un velosidat ku lo laga hopi koredó olímpiko babuká, ta akseptá COHO. Pa kolmo (básikamente) e mes vershon di e gabinete anterior.
Mi a fèrwagt ku Fòrti lo a sali bisa ku awor lo traha duru pa den futuro no mester di COHO mas. Sinembargo tabatin un yoradera splikando ku ta ora a drenta Fòrti a sa di e situashon finansiero. Pero, ta regularmente raportahenan mensual finansiero ta bai Staten. Akaso PM komo Parlamentario nunka a lesa nan i/òf pidi mas informashon?
Por sierto lo ta bon sa si awor ku a akseptá COHO lo kanselá e karta pa UN akusando Hulanda di ta mina nos outonomia i derechi pa independensia (2).
Nos mester realisá ku kompleho i sapatiamentu no ta yuda nos outonomia. E gran menasa pa outonomia no ta Den Haag, sino aki mes. Dor di no hasi lokual nos sa ku nos mester hasi. Outonomia ta pa hende grandi ku ke karga responsabilidat.
For di un komienso mi a sugerí pa mehorá e aspekto di desaroyo di COHO ku te ainda no ta sufisiente desaroyá. Ta di spera ku tin mas hende ku ta pensa asina i ku lo trese kambio.(1)
Ademas, nos mester ‘quiet diplomacy’ ku Den Haag (3). Forti i Stadhuis mester buska i traha riba ‘netwerk’ ku e ‘decision makers’ na Hulanda i mantené kanalnan ofishal i no-ofishal di kombersashon, habrí.
Willemstad, Kòrsou
(1,2,3)
Alex David Rosaria Blog 