Zomer di 1989. Un par di shen studiante universitario a yega for di vários parti di Merka na e ‘campus’ di Hofstra University na Long Island (New York) den preparashon promé ku sali pa diferente pais Afrikano pa hasi trabou boluntario durante 3 luna. E fasilitadó a bisa ku nos mester “eliminá peso inesesario.” Peso mental kousá pa nos prehuisionan ku lo stroba nos èksperensia. Peso material ya ku por a biaha ku solamente un tas di lomba. Mester a hasi eskoho konsiderando ku lo a bai lugánan sin awa potabel, koriente, ni sikiera toilet mientras mester a laga lugá pa remedi, angua sterelisá, kos pa purifiká awa. Einan mi a bira un minimalista.
Un minimalista ta rechasá lokual ta inesesario i ku no ta trese balor agregá. Kon esei ta tradusí den mi bida? Mi no tin hoya, oloshi i tur dia mi ta bisti e mesun sapatu, mesun tipo di ‘jeans’ pretu. Den kas no tin yen “kos di prònk” pero espasio habrí i algun dekorashon minimalista. Un sentimentu di liberashon den un mundu di akumulá mas i mas kos, kumpra outo luho, traha kas mas grandi, ora no tin espasio sufisiente ta kumpra ‘containers’ i ta hür espasio pa warda kos. Nos hamber pa mas kos aparentemente nunka ta keda satisfasé
Tradishonalmente nos ta hasi nos mes e promesa di kambia bida den aña nobo. Mi ta proponé konsiderá minimalismo, eliminá kos inesesario ku no tin balor agregá. Esaki ta bai skapabo hopi plaka mensualmente, plaka ku bo por usa pa paga bo debenan di a biba riba bo forsa. Plaka ta bin liber pa inbertí den èksperiensia signivativo pa bo i krea felisidat duradero. Kisas mas importante, minimalismo ta kontribuí na libertat, probablemente e balor mas importante èksistente.
Willemstad, Kòrsou
Alex David Rosaria Blog 