15 desèmber 2021 e akuerdo di gobernashon Hulandes Omzien naar elkaar, voortuitkijken naar de toekomst ta keda presentá. Hulanda ke entamá e proseso pa kambio den e relashonnan estatal den Reino, esta Statüt: “..eerlijke verkenning over eventuele aanpassing van het Statuut”.
16 mei 2003 e akuerdo di gobernashon Hulandes Meedoen, meer werk en minder regels ta keda presentá. Hulanda ta disidí ku mester kambia relashonnan den Reino i tambe nos relashon ku Union Oropeo: “Het kabinet spant zich in voor de erkenning van de bijzondere positie van de Nederlandse Antillen als ultraperifere gebieden in de zin van het EU-Verdrag”.
Kiko a pasa na 2003? Mientras nos tabata prepará pa un referèndum (2005) a base di nos derechi di outodeterminashon, Den Haag ta lansa “opshon UPG” ku ningun momentu tabata riba nos agènda. Esaki a kousa konsternashon pasombra e eskoho pais outónomo den Reino ku mantenshon di status LGO no ta kompatibel ku UPG.
Final di kuenta e opshon di UPG ku AVP di Aruba tabata lòbi pisá p’e na Kòrsou, a pèrdè forsa pasombra siendo den gobernashon pa 8 aña, AVP no por a realisá UPG. Na Kòrsou ningun partido (ku asiento) a hisa UPG for di tera.
Kiko nos a siña? Opshon UPG a frakasá básikamente pasombra e idea tabata unu netamente Hulandes. E tabata karesé ‘ownership’ di Kòrsou. Nos a pèrdè tempu balioso.
No por tuma Hulanda na malu, kompletamente. Nan sa kiko nan ke. Kòrsou no konosé planifikashon a largo plaso. Nos ta preferá e mentalidat di “yena buraku ku pida breu awe na lugá di planea nos infrastuktura di karetera di mayan”.
Ki dia nos ta pone algun hende ku konosementu debatí i presentá proposishonnan di eventual kambio den Reino òf di nos konstitushon na lugá di kore kabes di gai, pèrdè tempu kada biaha Den Haag kier kambia nos status? https://alexdavidrosaria.wordpress.com/2021/08/21/power-of-parliament-should-be-curbed-and-checked/ https://alexdavidrosaria.wordpress.com/2021/07/06/lets-talk-about-fixing-our-democracy/
Willemstad, Kòrsou
Alex David Rosaria Blog 