Dekolonisashon

Djaluna awor dekolonisashon ta den Staten. Un miembro a bisami di no sa di dokumentashon relevante ku lo forma base pa diskushon. Parsemi un oportunidat pa improvisá (kada 21 miembro ta haña 30 minüt di palabra), bati Hulanda, papia ‘nonsense’ i kita atenshon di nos realidat: no tin programa di gobernashon ni presupuesto, maneho devastador pa ku COVID, desòrdu públiko i redukshon di klase medio.

Mester realisá ku dekolonisashon segun Nashonnan Uní (i promé, Liga di Nashonnan) ta sea independensia, asosashon boluntario òf integrashon (ku un pais independiente). Den pasado èks kolonia Somalialand Italiano a integrá den Repúblika di Somalia. E teritorio Wèst Sahara ke un refèrendum pa skohe entre independensia òf integrashon den Maroko. Estadonan Federal di Micronesia for di 1986 a opta pa un asosashon boluntario ku Merka.

Nashonnan Uní (UN) ta laga ningun duda ku e derechi di dekolonisashon ta di pueblo i tambe ta stipulá ku pueblo mester “skohe su opshon di dekolonisashon den libertat”. Eskoho a base di libertat no por ta den man di 11 polítiko den Staten kaminda den nos sistema algun por a asta haña sero (0) voto.

Idealmente mester skohe via un referèndum liber. Ta di lamentá ku nos no tin un lei di referèndum. Unu ku ta determiná kua ta e mínimo kantidat di votadó p’e tin balides, i e persentahe nesesario di voto pa gana un referèndum konstitushonal. Pues, si apenas 10,000 hende vota i 5,001 disidí pa sea independensia òf integrashon, e ta balido? No tin lei ku ta bisa kontrali. Integrashon no solamente por ta den Hulanda. Tambe por skohe pa integrá den Venezuela.

Spera ku lo introdusí un moshon ku ta haña sosten pa bin ku lei di referèndum ku ta kontestá e puntonan ariba menshoná. Ademas mester eksihí pa establesé e (posibel) konsekuensia, kondishon, inkluso e plachi finansiero i di rekurso humano di dekolonisashon. No por laga polítikonan bolbe gaña nos ku Hulanda mester bai di akuerdo ku integrashon i nos lista di eksepshon. Tambe mester splika kon siendo independiente lo atendé ku defensa, miembresia di organisashonnan internashonal i relashonnan eksterior.

Dekolonisashon ta muchu importante pa lag’é den man di algun polítiko ku ta bria pa nan inkapasidat. E desishon mester ta di pueblo i p’esei e mester ta sólidamente ankrá den un lei ku no ta laga espasio pa duda i multi interpretashon.

Willemstad, Kòrsou

Referendum yes, but not without a referendum law

Advertisement