Van den Tweel no ke pa bo kompará su preisnan ku otro supermerkado

Manera ta sosodé sigur tres biaha pa siman, awe mi a hasi kompra na supermerkado Van den Tweel. Manera tambe sa sosodé, mi’n por a haña un produkto spesífiko riba e lista ku mi kasá a prepará, pues mi a disidí di saka un potrèt di un supstituto i puntr’é via app ku mi por dal bai. Pa mi sorpresa, un miembro di seguridat a reis riba mi i bisa: “Mener, no ta saka potrèt aki den”. Despues ku mi a splika e rason pa saka potrèt, e a bisa ku ta òrdu e tin. Mi a puntra pakiko no por saka potrèt. E di ku e no sa i ku no ta interesé pa sa. Mi a disidí di aserká un ‘teamleider’ pa haña algun kontesta. Teamleider ta bisa ku tin hende ta saka potrèt di artíkulo ku e preis i pone esakinan riba Facebook (FB) pa atvertí otronan di e diferensia di preis entre diferente supermerkado. Aparentemente tin un movementu riba FB pa hasi hende konsiente di (diferensia di) preis di komestibel. Esaki Van den Tweel no ta tolerá. Ora mi a puntr’e dikon den e situashon aktual ta prohibí pa praktiká transparensha i konsientisashon bou di konsumidó, e a bisa: “regla ta regla i kliente mester akseptá nos regla.” Poniendo su man na su tapaboka e a kontinua: “ata e regla di e sabínan den Fòrti ta ponemi bisti e kos ak hinter dia? Ta meskos mener.” Esei tabata e señal pa bai. Ami lo no hasi kompra mas na Van den Tweel.

Willemstad, Kòrsou

Advertisement