Ku repudio mi a lesa ku un hende ku ta yama su mes periodista, ta lastra algun ámtenar na un departamento di Gobièrnu, divulgando nan nòmber i foto riba plataformanan soshal. E persona den su atake shushi ta haña ku e ámtenarnan no ta funshoná i ta akusá nan di ta bòikotiá Fòrti, stroba desaroyo i di tin koló polítiko.
Si Gobièrnu tin problema ku funshonamentu di kualkier departamentu, e mandatario enkargá mester asumí su responsabilidat konforme reglanan vigente. Parlamentarionan semper por pidi e mandatario konserní splikashon. Asina ta prosedé den un pais demokrátiko i sivilisá.
Pero, a skohe pa drenta e kaya di bati-kibra, demotivando hinter e aparato ku awor mester ta prepará ku ken-ku-ta, sea pa plaka òf polítika, por skibi kontra di nan, i publiká nòmber, potrèt i otro dato personal. Kon e ámtenarnan i nan sernan kerí ku a bira víktima di e atake shushi aki lo mester ta sinti nan mes? T’asina ke kombensé nos hendenan kapasitá regresá Kòrsou?
E agreshon no ta un fayo inosente. E ta deliberá. Meskos, tempu un minister a pone un konferensia di prensa pa “grill” un hefe di servisio. E motibu tin tinta polítiko. Kisas pa tapa inkapasidat di Fòrti ta preferá akusá ámtenar indefenso, en bes di karga responsabilidat propio. Sindakato i otro organisashon mester kondená e akto aki. Prinsipalmente e minister responsabel p’e departamento.
Esaki ta otro akshon ku ta tòrnu na nos demokrasia i institutonan demokrátiko. Awor, kada un akshon riba su mes kisas no ta pone nos demokrasia i outonomia frakasá. Sinembargo, ora pone tur akshon huntu, nos lo mira ku nos outonomia ta na peliger, no pa motibu di Den Haag, sino pa nos mes falta. Ban spera ku no ta muchu lat ora nos realisá esaki.
Willemstad, Kòrsou
Alex David Rosaria Blog 