Kon historia lo husga nos?

Kuantu biaha nos no a demostrá repudio pa lei i kustumbernan di apenas algun generashon pasá ku tabata previligiá gruponan basá riba sekso, estado sivil i religion? Hende muhé no por a vota den elekshon; “uitgezonden krachten” for di Hulanda tabata pèrdè trabou na sierto empresanan si nan kasa ku yu di tera; no por a papia Papiamentu den Konseho Insular ni den kurá di skol; e hende muhé kasá no por a atendé nan asuntunan legal sin pèrmit di su kasá. E èkspreshon “si e pretu haña derechi di voto, hende lo kome karni humano i tene relashon ku animal” di J. Hamelberg (ku tin un kaya na su nòmber) i “ku hòmber mes Dios sa, kòrda hende muhé” di e frater Katóliko Radulphus, ta papia palabra kla. Awe sin pensa nos ta kalifiká esakinan komo barbaridat.

Inkomprendibel ta ku awe nos ta kometé e mesun fayonan di nos antepasadonan siendo konsiente kuantu daño esaki a kousa. Dikon ainda LGBTQ+ no tin derechi igual i nan tin ku sinti nan mes menospresiá pa komunidat inkluso iglesianan? Kua ta e diferensia entre Hamelberg i esun ku ta bisa ku si pèrmití kasamentu di mesun un sekso, lo bin kasamentu ku mucha di 12 aña tambe? Kon bin ainda nos ta maltratá hende muhé, estranhero, nos medio ambiente i animalnan den nòmber di “kultura” i “kustumber”? Kon bin ta imposibel hiba un diskushon sano i no-religioso-emoshonal tokante di eutanasia, abòrtus? 

Sea ku nos ke òf laga, kambio di hopi kos ku awe nos ta bringa, ta bin. No tin duda ku kasamentu di mesun sekso, fin di industria di petroli manera nos konosé, eutanasia, un moveshon di “formal authority” pa “moral authority” -djis pa menshoná algun- lo bira realidat. Nos ta keda sapatiá te ora e ola di kambio tapa nos òf nos ta akseptá i guia e proseso di kambio? E pregunta ta simpel. Kon nos ke pa historia kòrda nos? Kon nos ke pa esnan na 206o evaluá nos akshonnan awe? E kontesta no ta alentador si nos keda kana kabes abou ta buska “low hanging fruits” en bes di moldia nos futuro ku tin su retonan, bèrdat. Mas ku nunka nos mester di hende sin miedu pa kana dilanti, sin miedu di resistensia pa prepará nos pa futuro.

Willemstad, Curaçao