Manera mayoria hende mi a keda di shòk pa mira kon un persona ta tira su kurpa for di un edifisio pa despues mi lesa su karta di suisidio. Aparentemente e a pèrdè e bataya kontra di depreshon despues di a skond’e i no a buska yudansa profeshonal. Ta di lamentá ku e situashon mester a yega asina leu i mi ta manda mi palabranan di forsa pa famia i amigunan di e defuntu.
E kaso aki ta bolbe demostrá e nesesidat pa dediká mas rekurso na salú mental, prinsipalmente durante di e pandemia aki manera mi a skibi for di aprel 2020. Mas ku tur kos, ekspertonan mester, na un manera habrí, papia i konsientisá nos poblashon tokante di salú mental. Nos ainda tin e tradishon di stigmatizá, kondená i asta yama esnan ku ta sufri di depreshon òf ansiedat, loko. Hopi di esaki tin entre otro ke ber ku loke sierto religion a imprentá te ku 30 aña pasá den hende via di por ehèmpel katisashi (paragraf 2280-83), esta ku suisidio ta un krímen grandi i un piká kontra di dios.
Ta tempu pa nos stòp ku e legado lamentabel aki i rekonosé ku entre otro desbalanse sikológiko, angustia, ekspektativanan irealistiko, biba riba nos forsa, maluso di alkohol, droga, ekskluson soshal i soledat ta afektá negativamente nos salú mental i por hiba algun di nos na suisidio.
Stigmatisashon i dramatisashon segun ekspertonan no ta yuda e kousa. Silensio tampoko. Mester trata suisidio komo un aspekto di salú públiko. Suisidio mester keda rekonosé komo un intento (desesperá) pa skapa di un sufrimentu ku a bira asina grandi ku e persona no ta mira otro manera pa haña alivio ku no ta morto. Loke tambe nos mester realisá ta ku e persona ei lo a preferá un otro alternativa. Nos no mester kondená e persona ku ta konsiderá suisidio, pero yud’é buska ayudo i haña un alternativa.
Willemstad, Kòrsou
Alex David Rosaria Blog 