Mas instabilidat polítiko ta vislumbrando.
No por a skapa nos atenshon ku tenshon bou di sindikatonan aki na Kòrsou ta kresiendo den último tempu ku asta lo por resultá den akshonnan grandi (otro aña). Menasa di un integrante di koalishon resientemente den direkshon di algun sindikalista a asta empeorá e situashon.
Tin tur indikashon ku e dos partidonan mas grandi di oposishon awor ta bai konsentrá nan flechanan riba e minister di Enseñansa (i Presidente di MFK) ku aktualmente ta e persona polítikamente mas importante den su partido i koalishon. Ta opvio ku mas oposishon keda bati e minister di Salubridat -sin duda e piesa mas swak den Fòrti- mas espasio e presidente di MFK tin pa maniobrá. Oposishon mester ta na altura ku pa debilitá e koalishon, mester ataká e minister di Enseñansa. Nan lo hasi esaki? Es por ver. Te kon leu e dos partidonan mas grandi den oposishon lo saka probecho? Ta dependé si nan por fiha un strategia klaritu i koherente. Mester kòrda si ku ámbos partido ta den un proseso di reorganisashon ku ta leu for di kla i ku probablemente mester produsí dos (2) lider polítiko nobo.
PNP ku ta sostené e koalishon tin mas di pèrdè ku tur hende den e situashon aktual. PNP a haña durante di elekshon pasá hopi votadó ku pa promé biaha a vota bèrdè. Pa e votadònan aki PNP ta esun ku a presentá mas kara profeshonal i kapasidat di gobernashon. E pregunta ta keda te kon leu nan lo keda karga ku e partido ku muchu biaha ta keda ketu mientras nan partner mayó den gobernashon ta kometé vupá tras di vupá manera e fantasma di Plan B, presuntu iregularidat na Kas di Kòrsou, fayonan garafal di minister di Salubridat, yàgmentu di hende (na RDK, na ministerio di Finansa, na servisio di Impuesto) i mas.
E organisashon polítiko ku tin mas chèns na mi pareser pa probechá di e situashon aktual ta KEM. KEM por keda bisa ku e ta kontra di COHO (lokual tambe e a hasi durante un bishita na Hulanda) mientras e dosnan ku ta den Fòrti a guli COHO apesar di a bisa otro den kampaña. Ta dudoso ku si PNP saka stèker, KEM lo drenta, sostené COHO i mantené MFK den gobernashon.
No ménos importante ta e konsekuensianan di (posibel) paramentu di karnaval, festival di tumba, festival Kantadó Mayó, marcha di seú. No ta pornada e konsepto di “geef het volk brood en spelen” histórikamente tabata keda usá komo un klèp di alivio pa e masa, sigur den tempunan difísil. Si e klèp aki kai afó e strès kolektivo por bira eksplosivo. E tempunan difísil lo keda por lo pronto pa motibu di COVID (i su múltiple mutuashonnan), gastunan impagabel den salubridat, inflashon, oumento di preis di gasolin, awa i koriente, posibel konsekuensianan di kaso-Ennia, insertidumbre pa ku refineria, kontinuashon di un dekresementu di nos poblashon i su konsekuensianan direkto pa nos fondonan soshal i di penshon.
Ta parse ku atrobe un grupo grandi di votadó lo ta buskando un alternativa. Tempu ta hechu p’esei. Den esaki no mester supestimá e opshon di provinsia. Si porfin un organisashon polítiko serio, kapas, sin primintí shelu i tera lanta pa propagá provinsia/UPG -ku mi ta kalkulá ta gosa di 25% mas o ménos di sosten- esaki lo por sòru pa un sorpresa den polítika.
Einan nos ta. Ku mi tin rasón si òf no òf parsialmente, tempu lo demostrá.
Willemstad, Kòrsou
Alex David Rosaria Blog 