Minister di Salubridat no ta komprondé su tarea

Ku e minister di Salubridat Públiko no ta komprondé su tarea i ta mas bien un peliger pa salú públiko, mester ta mas kla ku di dia. Awor e minister ta papia di tuma pildorá di Ivermectin kontra di COVID mientras e remedi aki ta mas bien pa trato di bichi parasítiko i pruga. Esaki despues ku anteriormente e mesun minister a pretendé ku su bèrdat personal basá riba ken sa ki sekta, ta bin nan promé lugá den un krísis di salubridat? E mester komprondé ku e ta minister i no ta un di e hopi ‘èkspertonan’ di Facebook ku ta venená e pueblo dor di plama lokura tur dia tokante di e pandemia. E minister konsientemente ta alimentá i empoderá e tipo di figuranan aki. T’esei ta su intenshon, òf e ta ignorante? E bakunashon ta e manera mas efektivo segun siensia pa prevení COVID. I, te ainda no tin alternativa pa bakunashon ku ta mes òf mas efektivo. Tambe ta bèrdat ku esnan ku ta muri di COVID na Kòrsou, ta hendenan no bakuná (kompletamente). Si e minister ke keda kere den su bèrdat, e por. Den e kaso ei e no por ta minister pasombra e ta un peliger. Remarkabel ta ku e otro partido den koalishon ta ketu ketu i te ainda ta guli manda abou i akspetá i aprobá e maneho aki. Bèrgonsoso. Bèrgonsoso tambe ku Staten, sigur miembronan di oposishon no ta tuma e situashon aki na serio i presentá por lo ménos un moshon di desaprobashon kontra di e minister.

Bozeman, Montana

Advertisement