Korte mester ta mas transparente kon e ta atendé ku fayonan

Anteriormente mi a skibi ku di e trias polítika riba kua nos sistema demokrátiko ta ankrá, e parti ku mihó ta funshoná ta e poder hudisial (Korte). No tin duda. Ku mihó mi kier men ku e poder aki ta basá riba echo, lei i nos konstitushon. Pues e atake shushi di ‘pastornan’ kristian kuestionando konfiabilidat di Korte pasombra esaki ta para pa lei i no e odio ku e kristiannan aki tin kontra di un minoria na Kòrsou, ta lamentabel. Por sierto asina aki demokrasia ta muri; dor di kibra/kuestioná su fundeshinan. https://alexdavidrosaria.wordpress.com/2017/04/19/korte-ta-salbando-nos-demokrasia/

Nos sistema di Korte no ta perfekto. Mi ke trata un di e aspektonan aki, esta kon Korte ta atendé ku su mes fayonan. Ora un notario peka ku su funshon, un ‘tuchtcommissie’ speshal pa notario (ku ta presidí pa e Presidente di Korte) ta disidí kiko mester pasa ku esun ku a faya. Mes kos ta konta pa e profeshon di médiko, abogado, polis i mas. Kiko ta pasa ku un hues ku a faya?

Lagami bai bèk na un kòmbersashon ofishal ku mi tabatin ku e Presidente di Korte siendo (kasi na fin di mi posishon komo) Parlamentario djis despues di e fayo garafal di un hues komisario ku a pone ku un ladron grandi di koper a sali liber. A resultá ku pa falta di plaka i personal huesnan komisario tin biaha tin apenas 30 minüt di tempu pa studia un kaso, promé ku yega na desishon.

Mi no por husga trabou di un hues komisario. Mi pregunta tabata kiko ta pasa ku n’e den e kaso ei? E a/lo keda sanshoná? Kuantu hues a keda sanshoná último tempu? I ken ta evaluá nan funshonamentu?

E kontestanan a sorprendémi. A resultá ku ora algu “straño, inusual òf robes” sosode ta Korte mes, pues nan ku nan, ta evaluá otro. E Presidente di Korte no kier a bisami kuantu biaha esaki a yega di sosodé, tambe e a ninga di bisami kua tabata e sanshonnan ku a yega di imponé den pasado. Mi petishon pa trese un kambio a keda kontestá ku un sonrisa diplomátiko ku ami a mira komo: “Rosaria, peña saka”.

Esaki no por. Trias polítika tei pa balansá (i no separá manera hopi hende ta bisa) poder den nos sistema demokrátiko. E sistema ku mi a deskribí no ta den balansa, e no ta kumpli ku e ‘checks and balances’ ku ta asina importante den un demokrasia, e no ta transparente. I aparentemente no por konta riba Korte pa drecha esaki.

Willemstad, Curaçao